INDARKERIA MATXISTA

Ertzain bat atxilotu dute sexu eraso baten harira

Emakume bati Bilbon eraso egin diolakoan atzeman dute polizia, eta Ertzaintzak apartatu egin du behin-behinean. 49 urte ditu.

Ertzaintzaren ibilgailu batzuk, artxiboko irudi batean.
Ertzaintzaren ibilgailu batzuk, artxiboko irudi batean. Miguel Toña/Efe

Berria -

2019ko otsailak 12

Joan den igandean atzeman zuen polizia Ertzaintzak berak, Iurretan (Bizkaia) duen egoitzan zegoela. Ertzaintzaren Brigada Mugikorraren egoitza da Iurretakoa.

Eusko Jaurlaritzako Segurtasun Sailak berri eman duenez, emakume batek jarri du ertzainaren aurkako salaketa; azaldu du sexu erasoa egin ziola Bilbon.

Igandean atzeman zuten ertzaina, eta astelehenean bidali zuten epaitegira. Behin-behinean libre utzi du epaileak, kargupean, eta emakumearengana gerturatzeko debekua ezarri dio. 49 urte ditu gizonak.

Ertzaintzak espedientea zabaldu dio, eta apartatu egin du epaiketa egin arte.