HEZKUNTZA

Otsailaren 26an grebara joko dute Arabako, Bizkaiko eta Gipuzkoako eskola jantokietan

Sindikatu guztiek elkarrekin deitu dute lanuztera, eta eskatu dute Hezkuntza Saileko sukaldarien baldintza berberak izatea enpresa pribatuek kudeatutako jangeletan ari diren langileek.

Umeak, ikastetxe bateko jantokin.
Umeak, ikastetxe bateko jantokin. Gari Garaialde/Foku

Garikoitz Goikoetxea -

2019ko otsailak 12

Beste lan gatazka bat Arabako, Bizkaiko eta Gipuzkoako hezkuntzan. Kudeaketa pribatua duten eskola jantokietako langileek grebara joko dute otsailaren 26an. Sindikatu guztiek elkarrekin deitu dute protestara: LABek, ELAk, CCOOk eta UGTk.

Azaldu dute azken bi urteetan hamabost aldiz bildu dela negoziazio mahaia, baina enpresen proposamena urrun dagoela sindikatuen eskarietatik. Gako nagusia hau da: Hezkuntza Saileko sukalde langileekin "homologazioa" lortzea. Areago, salatu dute indarrean dagoen hitzarmeneko akordioak "ukatzen" ari direla enpresak orain.

Homologazioarekin batera, badituzte beste gatazka puntu batzuk: gutxieneko lanaldiak finkatzea, ratioak hobetzea, ordezkapenak ezartzea... Jarrera "arduragabea" izatea leporatu diete enpresei. Kritiko mintzatu dira Eusko Jaurlaritzaren jokabidearekin ere. Azaldu dute gobernuak aurki argitaratuko dituela eskola jantokietarako baldintza berriak, eta kezkatuta daude Hezkuntza Sailaren azken iragarpenarekin: guraso elkarteen esku utzi ahalko dela jantokien kudeaketa. Proposamen hori "inolako fundamenturik gabe" egin izana salatu dute langileek. "Gure artean zalantza eta kezka erabatekoa da, ez baitakigu gure lanpostuekin benetan zer gertatuko den".

Otsailaren 26ko grebarekin hasiko dituzte protestak, eta iragarri dute mobilizazioak gogortzeko prest daudela.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna