A-63 autobidean, Biritatutik (Lapurdi) Ondreserako (Landak, Okzitania) tartean, deskontu sistema ezartzea adostu dute Euskal Elkargoak eta autobidea kudeatzen duen Vinci Autoroutes enpresak. Deskontuak %50ekoak izango dira trafiko handieneko orduetan. Goizean, 7:00etatik 9:00etarako tartean merkatuko da bidesaria, eta, arratsaldean, 17:00etatik 19:00etara. Ordu tarte horietan, %70eko deskontua izango dute teleordainketa sistemaren erabiltzaileek.
"Azkenean lortu dugu. Iraultza txiki bat da hiri mugkortasunean", adierazi du Jean Rene Etxegarai Euskal Elkargoko lehendakariak. Ipar Euskal Herriko erakundeak diru publikoarekin osatuko du deskontu sistemak enpresari eragingo dion mozkin murrizketaren zati bat.
Egun, Biriatutik Ondres arteko tartea egiteko 4,20 euro ordaindu behar dute auto arruntek. Aldiz, %70eko deskontua jasotzeko baldintzak betetzen dituzten erabiltzaileek 1,26 euro ordainduko dituzte deskontu sistema berriarekin.
Frantziako Gobernuak urtarrilean iragarri zuen estatuko autobideetako enpresa emakidun guztiek deskontuak eskainiko zizkiela erabiltzaileei. Deskontu horiek, gutxienez, %30ekoak izango zirela aurreratu zuen. Jaka Horien haserreari erantzuteko neurri gisa aurkeztu zuen gobernuak, eta azaladu zuen herritarren erosteko ahalmena handitzea duela helburu. Jaka Horien eskakizunetako bat zen autobideetako bidesarien merkatzea.
