G7koen aurkako Oldartu dinamika abiatu dute Ipar Euskal Herriko hainbat gaztek

G7koen goi bileraren izaera bera eta hartuko dituzten segurtasun neurriak salatu dituzte. Desobedientzia zibila landu eta alternatiben bozgoragailu izateko borondatea erakutsi dute

Oldartu gazte dinamikako kideak
Oldartu gazte dinamikako kideak Berria

Ekhi Erremundegi Beloki -

2019ko otsailak 19

G7koen gailurra Biarritzen (Lapurdi) antolatzearen "inposaketari eta probokaziari" aurre egiteko Oldartu dinamika abiatu du Ipar Euskal Herriko gazte talde batek. "Ez dugu G7rik nahi, ez hemen ez nehon", adierazi dute agiri batean, "haserrea eta sumina" antolatzera deituz.

Gauza on guti ikusten baitiote gailurrari: "Kapitalaren legeak bermatu, elite ekonomikoen interesak defendatu eta esplotazioa betikotzeak elkartzen ditu G7koen estatuburuak. Finantza erakunde handienekin batera, sistema kapitalistaren mundu mailako norabidea finkatzeko boterea dute haien eskuen artean". Lekua bera sinbolikoa da, Oldartu dinamika sortu dutenen begietan: "Turismo masiboaren adibide den postaletako hirira etorriko dira, euskal kulturaren folklorizazioa, prekaritatea eta etxebizitzen prezioaren etengabeko igoera nahasten diren Lapurdiko kostaldera". Haien iritziz, euskal gazteriak duintasunez bizitzerik ez duen leku batera.

Halaber, agorril bukaerarako Lapurdi kostaldean prestatzen ari diren segurtasun dispositiboa ere deitoratu dute. "Ordenaren zakurrek segurtasuna bermatuko dute, eskubide zibil eta politikoak ukatu behar badituzte ere. Pairatzen dugun dominazio sistema oso bat defendatzeko, honen aurpegirik autoritarioena eskainiko digute".

G7tik harago

Oldartu dinamika bultzatu dutenen iritziz, G7koen goi bilerak iraunen duen egunetan mobilizatzeaz gain, etengabekoa izan behar da euskal gazteriaren borroka sistema kapitalistak Euskal Herrian dituen aliatuen kontra. "Jakintza teoriko eta praktikoak kolektibizatu, desobedientzia zibila landu, eta alternatiben bozgoragailu izan nahi dugu gazteok. Bide batez, pertsona askez osaturiko herri burujabe baten alde gure ekarpena eginez".

Ildo horretan, G7koek ordezkatzen duten sistema errotik iraultzeko borondatea erakutsi dute: "Prekarizazio bortitzaren garaiotan, klase elkartasuna da gure bizi baldintzak hobetzeko bidea. Baliabide naturalen ustiaketa mugagabea eta aberastasunaren metaketaren logika borrokatuz, pertsonen eta ingurumenaren zaintza erdigunean ezar ditzagun. Ahaldundu garelako, autodefentsa feminista praktikan jarri eta generoaren araberako botere harremanekin bukatzeko engaiamendua hartzen dugu. Inperialismoak sortutako gerlen eta miseriaren ihesi heldu direnei babesa ematen dien harrera herria gara, internazionalismoa mundua aldatzeko ezinbesteko tresnatzat duena. sistema kapitalistak behar duen lan eskua prestatu, Frantzia eta Espainiako hiritar asimilatuak sortu eta genero zapalkuntza birproduzitzen duen hezkuntza honekin bukatu eta gure kultura zein hizkuntza biziberrituko duen zapalduon mesedetara egonen den hezkuntza eraikiko dugu".