Eusko Jaurlaritzaren Segurtasun Sailak jakitera eman duenez, 30 urteko gizonezko bat atxilotu dute Tolosan (Gipuzkoa) emakume bati eraso eta ukituak egitea leporatuta, eta Beasainen (Gipuzkoa) 72 urteko gizon bat atxilotu dute ibaiaren aldameneko pasealeku batean adingabeen aurrean masturbatzeagatik.
Segurtasun Sailak azaldu duenez, Tolosan erasoa jasandakoa beste emakumezko batekin zihoan, San Frantzisko auzoan zeuden, eta goizaldeko hiruak eta laurdenak ziren. Bi neskak gizonarengandik korrika ihes egiten ikusi zituzten ertzainek. Haiekin hitz egin ondoren, erasotzailea inguruko kalexka batean atxilotu zuten, sexu askatasunaren aurkako delitua leporatuta, eta epailearen esku utzi zuten gero.
Beasaingo gertakaria ostiralean izan zen, 16:30ak aldera. Emakume batek dei egin zion Ertzaintzari. Poliziak iritsi zirenean, gizona haur batzuen aurrean masturbatzen ari zela ikusi zuten. Adingabeen aurreko exhibizionismo delitua leporatu diote. Aurrekariak zituen antzeko gertakariengatik.