Urriaren 1eko erreferendumaren nondik norakoak argitzeko ekitaldia egin zuten 2017ko uztailaren 4an Kataluniako Antzoki Nazionalean. Gerora, Kataluniako prozesu subiranistari lotutako auzia hasi zutenean, ekitaldi haren finantzaketari buruz galdetu zioten Junts pel Si alderdiari eta hark erantzun bera izan zela gastuak ordaindu zituena.
Gaur, Bartzelonako 13. instrukzio auzitegiko epailearen aginduz, Kataluniako Parlamentuan sartu da Guardia Zibila aipatutako ekitaldiarekin lotutako fakturen eta agirien bila. Bi agente joan dira parlamentura, ekitaldia diru publikoarekin ordaindu zuten argitzeko helburuz. Hala, Espainiako segurtasun indarrek bost eguneko epea jarri dute eskatutako dokumentuak aurkezteko.
Ez da lehen aldia Guardia Zibila dokumentu horien bila joaten dela. 2017ko uztailaren 13an bertan, Antzoki Nazionalera joan zen ekitaldiaren inguruko informazio eske. Ordu hartan, Junts pel Si-ko buru zen Jordi Turullek adierazi zuen alderdiak ordaindu zituela ekitaldiaren gastu guztiak —17.610 euro— eta eskatutako agiriak aurkeztu zituen.
