Eskuina batzea. Horixe litzateke balizko koalizioaren azken helburua. Diario de Noticias egunkariak atera ditu argitara UPNko buru Javier Esparzaren asmoak. Alegia, PPrekin ez ezik, Ciudadanosekin ere bat egitea apirilean eta maiatzean egingo diren hauteskundeetarako, eta, era horretan, egun agintean den laukoari aurrea hartzea.
Zuzendaritzaren oniritzia soilik geratzen zaio akordioari finko bilakatzeko. Izan ere, Nafarroako egunkariak zabaldu duenez, Alderdi Popularra Esparzaren asmoen jakitun zen joan den asteazkenean bi alderdien arteko akordioa jendaurrean aurkeztu zutenean. Hala, UPNko eta Ciudadanoseko zuzendaritza batzordeen azken baietzaren zain leudeke arduradunak hiruko aliantza publikoki aurkezteko.
Zabaldu den informazioaren arabera, Ciudadanosen eskariz puntu bat gehitu diote bi aldeen arteko akordioari, zeinaren arabera zehazten den Nafarroak Espainiari egiten dizkion ekarpenak "gardenak" izango direla.
