Kurdistan

Estrasburgok esan du Turkiak "adierazpen askatasuna urratu" zuela egunkari kurdu bat ixtean

Europako Giza Eskubideen Auzitegiak Turkiari agindu dio 3.500 euro ordaintzeko Ali Gurbuz egunkariko zuzendariari.

Ozgur Gundem egunkariaren itxiera salatzeko manifestazioa Istanbulen, 2016ko abuztuan.
Ozgur Gundem egunkariaren itxiera salatzeko manifestazioa Istanbulen, 2016ko abuztuan. SEDAT SUNA/EFE.

Ane Ubegun Goikoetxea -

2019ko martxoak 12

Giza Eskubideen Europako Auzitegiak adierazi du Turkiako Gobernuak adierazpen askatasuna urratu zuela 2016an Ozgur Gundem egunkari kurdua itxi zuenean. Azaldu du prozedura kriminalak «sistematikoki ireki» zituela egunkariaren aurka, edukia kontuan hartu gabe.

2016ko abuztuan eman zuen Turkiako auzitegi batek Ozgur Gundem (Gaurkotasun Librea) egunkaria ixteko agindua, «PKK Kurdistango Langileen Alderdiaren propaganda egitea eta terroristen bozeramaile izatea» egotzita. Operazio horretan, egunkariko 24 langile eta kazetari atxilotu zituzten, eta Turkiako unitate bereziak indarrez sartu ziren kazetaren bulego nagusian, Istanbulen. Bertan zegoen informazio eta dokumentazio guztia eraman zuten, eta egoitza zigilatu.

Dena den, kazeta kurdu hori ia sortu zenetik egon zen arriskuan. 1992an jarri zen martxan, eta, orduz geroztik, gobernuak behin baino gehiagotan ixteaz gain, egunkariko kazetariak hil eta espetxeratu dituzte; esate baterako, 1994an hiru bonba lehertu zituzten egunkariaren inprimategietan, Ankaran eta Istanbulen. 2011n, ibilbide berri bat abiatu zuen, eta 6.700 ale inguru saltzen zituen —turkieraz argitaratzen zen soilik—.

2016ko uztailean Recep Tayyip Erdogan egungo Turkiako presidentearen aurka estatu kolpea eman zuen militar talde batek, eta jakina zen Ozgur Gundem egunkariaren aurka egingo zuela berehala. Aurretik, Fiskaltzak hainbat auzi ireki zituen kazetaren aurka, Abdullah Ocalan buruzagi kurduaren iritzi artikuluak argitaratzeagatik eta Murat Karayilan eta Cemal Bayik PKK-ko buruzagi militarrak elkarrizketatzeagatik. Erdoganek estatu kolpea gertatu baino lehen ere zenbait komunikabide erasotu zituen, besteak beste, martxoan Zaman egunkariaren kontrola bereganatu zuen, eta Cumhuriyet kazetako zuzendaria eta berriemaile bat atxilo hartu zituzten. Denera, 130 komunikabide itxi zituzten hilabete horietan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna