Aseguru etxeak

Bizkaian 37 pertsona ikertzen ari dira aseguru etxeei iruzur egitea egotzita

Segurtasun Sailak adierazi duenez, 122.000 euro inguruko iruzurra egin dute, gezurrezko trafiko istripuen bidez.

Errepide istripu bat, artxiboko argazki batean. /
Errepide istripu bat, artxiboko argazki batean. / EFE

Berria -

2019ko martxoak 14

Ertzaintzak azken urtean abiatutako ikerketak atera du iruzurra argitara. Bilbo, Barakaldo, Getxo eta Durangoko auzitegiak 37 pertsona ikertzen ari dira, aseguru etxeei 122.000 euro inguruko iruzurra egitea leporatuta. Iazko urte hasieran abiatu zuten ikerketa, aseguru etxe bateko ordezkari batek aurkeztutako salaketan oinarrituta.

Bi eratara egiten zuten iruzur. Batzuetan, alokairuko ibilgailuak erabiltzen zituzten istripuak eragiteko, aurrez ahalik eta estaldura zabalena zuen asegurua kontratatuta, kalte-ordaina ahalik eta handiena izan zedin. Istripua izan eta egun batzuetara, ustezko biktimak larrialdietara joaten ziren, eta, jarraian, Traumatologia Sailera, errehabilitazioa jasotzera. Kalte-ordainak jasotakoan amaitzen zen prozedura guztia.

Beste batzuetan, ustezko iruzurgileek bigarren eskuko ibilgailu bat erostea adosten zuten, eta, asegurua oraindik lehenengo jabearen izenean zegoenean, eta administrazioko tramiteak hasi aurretik, istripu bat eragiten zuten. Ondoren, berriz ere, istripuan zerikusia izan zuten beste gidariekin akordioa hitzartu, eta berriro ere larrialdietara jotzen zuten, jarraian kalte-ordainak jaso ahal izateko.
 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna