Laukoak egindako erreformak erraztu egin zuen talde batzuek errenta bermatua jasotzeak, eta, horren eskutik, 2018ko martxoan jo zuten goia banatutako errentek: 12.780.
Baina, egoera ekonomikoak hobera egin ahala, txikitu egin da jasotzaileen kopurua. Urtearen amaierarako martxoan baino 218 gutxiago ziren (-%1,7). Beheranzko joerari eutsi dio 2019 hasierak: aurtengo urtarrilean eta otsailean iazko hilabete horietan baino %4,2 errenta gutxiago banatu ditu Nafarroako Gobernuak.
Miguel Laparra Eskubide Sozialetako lehendakariordeak azaldu duenez, errenta bermatuak 36.303 nafar babesten ditu. Horien artean talderik handiena adingabekoak dira (%36,45). Laguntza jasotzen duten bost familietatik bat guraso bakarrekoak dira, eta horietako gehienetan emakumea da guraso hori. Hiru eskatzaileetatik bik herritartasun espainiarra dute.
Iruñean biltzen dira errenta bermatua jasotzen duten familia gehienak (%40,9), eta bereziki Arrotxapean (%7,6) eta Azpilagañan (%6,5). Iruñerriko beste herrietan (%22,1), Erriberan (%15,8) eta Estellerrian (%9,8) ere jasotzaile ugari daude.