Bakea eta bizikidetza

EAJk eta Elkarrekin Podemosek akordioa egin dute Memoria Lantaldean

Eusko Legebiltzarreko lantaldean ez zegoen adostasunik aurrera begira jarraitu beharreko bideaz, eta gaurko bileran "hastapeneko akordio" bat lortu dutela jakinarazi du Ana Oregi (EAJ) lantaldeko lehendakariak.

Memoria Lantaldearen martxoko bilera.
Memoria Lantaldearen martxoko bilera. ENDIKA PORTILLO / FOKU

Hodei Iruretagoiena -

2019ko martxoak 15

Ez aurrera ez atzera egon da azken hilabeteetan Eusko Legebiltzarreko Memoria Lantaldea. Gaur, ordea, aurrerabide bat aurkitu dutela dirudi. Hala jakinarazi die berri agentziei Ana Oregi lantaldeko lehendakariak. Diskrezioari eusteko konpromisoagatik, ez dute xehetasunik eman, baina EAJk eta Elkarrekin Podemosek hainbat gaitan "hastapeneko akordio" bat lortu dutela azaldu du Oregik. Hala baieztatu dute Elkarrekin Podemoseko iturriek ere: "sintonia" bat badagoela esan dute, eta "diskrezioz lanean" jarraitu behar dela.

Joan den martxoaren 4an egin zuen azken bilera Memoria Lantaldeak, baina ez zen aurrerapausorik izan orduko hartan. Adituen agerraldien ondoren, ondorioen txosten bat egin zuten, baina horren ondoren etorri zen blokeoa. Abenduaren 17an egin zuten bilera bat —martxokoaren aurretik egindako azkena—, eta EH Bilduk eta PSEk desadostasunak agertu zituzten ondorioen txostenarekin. EAJ eta PSE batera daude gobernuan, baina gai honetan ez dira bat etorri, eta gaurko informazioen arabera, badirudi jeltzaleen posizioa gertuago dagoela Elkarrekin Podemosek duenarekin.

PPk izan ezik —ez du lantaldean parte hartzen—, ondorioen txostenari ekarpenak aurkeztu zizkioten gainerako taldeek, eta EH Bilduko kideek gaur azaldu dute, "borondate politikoa" badago, posible dela beraien zuzenketak "akordio zabalago" baten barruan sartzea, haien arabera, "bateragarriak" direlako lantaldeak egindako oinarrizko txostenarekin.

PSE-EEk, berriz, desadostasuna agertu du ondorioen txostenarekin, haien iritziz, ez duelako errespetatzen aurreko legealdian adostutako "zoru etikoa".

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna