Zalantza ugari daude oraindik atzo Herbehereetako Utrecht hirian izandako erasoaren inguruan. Hasiera batean "eraso terroristaren" hipotesia zabaldu zuten agintariek, eta azken orduetan indarra galdu du aukera horrek, atzean "arrazoi pertsonalak" egon zitezkeela-eta. Susmagarri nagusia —37 urteko gizon bat— eta beste bi atxilotuak galdekatzen aritu da gaur Polizia, eta Herbeheretako Fiskaltzak jakinarazitakoek ez dituzte zalantzak uxatu.
"Ez dirudi erasotzaileak biktimekin harremanik zuenik", esan dute, eta azken orduetan bestelako informazioa zabaldu bada ere, nabarmendu dute ez dutela baztertu "eraso terroristaren" aukera. Gutun bat topatu dute ustezko erasotzaileak ihes egin zuen autoan, eta horrek indartuko luke, Fiskaltzaren esanetan, "terrorismoaren" hipotesia.
19 urteko neska bat eta 28 eta 49 urteko bi gizon dira hildakoak, Fiskaltzak zehaztu duenez. Beste hiru lagun larri daude.
Poliziak, bestalde, argitu du atxilotutako guztiek jarraitzen dutela beraien esku: "Atxilotuta daude eta susmagarri izaten jarraitzen dute".
10:45 aldera izan zen erasoa Utrecht mendebaldeko Urriak 24 plazan; gizon bat tiroka hasi zen tranbia batean, eta gutxienez hiru pertsona hil eta bederatzi zauritu zituen.