eh bildu

Otegi: "Berdinen arteko euskal errepublika nahi dugu"

'La Jornada' Mexikoko kazetak elkarrizketa egin dio EH Bilduko koordinatzaile nagusiari. Gatazka politikoaren "irtenbidea, itundutako erreferenduma" egitea izango dela uste du.

Arnaldo Otegi EH Bilduko koordinatzaile nagusia, gaur, Mexikon, 'La Jornada' egunkariarekin.
Arnaldo Otegi EH Bilduko koordinatzaile nagusia, gaur, Mexikon, 'La Jornada' egunkariarekin.

Berria -

2019ko martxoak 19

Mexikon dabil azkeneko egunetan Arnaldo Otegi EH Bilduko koordinatzaile nagusia, eta gaur La Jornada egunkari ezagunak egin dion elkarrizketan euskal errepublikaren egitasmoaz hitz egin du. Nolakoa nahiko lukeen galdetu diote. "Ulertzeko oso erraza den moduan laburbiltzen dugu: berdinen arteko euskal errepublika", erantzun du.

Gatazka politikoaren "irtenbidea", Euskal Herriak —eta Kataluniak— Espainiako Estatuarekin "itundutako erreferenduma" izango dela uste du Otegik. Hori erdiesteko, baina, Madrilera "herri gisa" joan behar dela aldarrikatu du. "Ezin gara Madrilera alderdi bezala joan, herri gisa baizik. Jendeari galdetuko diogu ea ados dagoen [EAEko estatus politkoaz]". Iritzi dio "pazientzia" izanda, euskal herritarrek ere bozkatuko dutela zer izan nahi duten.

Aldiz, Espainiako Estatuari "lotuta" segituz gero, "indar erreakzionarioen" menpe egongo direla dio Otegik, eta hori XIX. mendera itzultzea bezalakoa izango dela. Hiru dira, haren arabera, estatuak dituen krisiak: ekonomikoa —eta EH Bilduko buruzagiak dio Madrilek ez duela eredu alternatibarik—; lurralde mailakoa —Kataluniako prozesuak eragindakoa—; eta ETArik gabeko egoerak sortu diona. "Mahai gainean ideien eztabaida dagoenean, haiek indarra baino ez dute erabiltzen Espainiako Estatuari batuta eusteko".

Pasa den igandean BERRIAk argitaratu zuen Otegiren elkarrizketa.

Gaurko agenda

Mexikoko intelektual ezagunekin bilera izango du Otegik, Giza Eskubideen egoitzan hitzaldi bat emango du eta hartueman instituzional batzuk egingo ditu —Marti Batres Senatuko presidentearekin bilera egin du—.

Atzo Cuauhtemoc Cardenasekin bildu zen. Politikari, Internazional Sozialistako ohorezko presidente eta fundazio horretako buruetakoa da Cardenas. 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna