Eraso matxista

Zeladore batek egindako erasoa salatu du andre batek

Atzo izan zen erasoa, Bilboko klinika batean. Lasaigarrien eraginpean zegoela gizonak baginan atzamarrak sartu zizkiola salatu du. Mugimendu feministak elkarretaratzera deitu du biharko.

Andoni Canellada / Foku

Ibai Maruri Bilbao -

2019ko martxoak 19

Orozkoko andre batek egin du salaketa: atzo goizean Bilboko klinika batera, proba mediku bat egitera, eta bukatutakoan boxetara zeraman zeladoreak eraso egin zion. Aiaraldea.eus atariak eman du salaketaren berri.  Emakumeak berak kontatu die gertatutakoa: «Proba egin eta gero boxetara igo ninduten, oraindik lasaigarrien eraginpean nengoela. Zeladoreak —gizonezkoa— baginan sartu zizkidan atzamarrak. ‘Lasai, gozatu, erlaxatu...’, esaten zidan. Begiak ireki nituen, ez nekien zer egin, ez nuen sinistu nahi». Emakumearen lekukotzaren arabera, ondoren bularrak ukitu zitzaion.

Erietxetik irten aurretik medikuarekin hitz egitea erabaki zuen. «Gaizki sentitzen nintzen. Lotsa gainditu eta dena kontatu nion». Medikua salaketaren larritasunaz jabetu zen, eta solairuko arduradunarengana jo zuten segidan. Hark andrearekin izandako jarrera ez zen egokia izan: «Seguru nengoen galdetu zidan, zalantzakor. ‘Emakumeok badakigu non sartzen diguten eskua’, argitu nion». Erasotzaileak ondoren izandako jarrera ere salatu du: «Medikuarekin ari nintzela irribarretsu sartu zen bulegora. Igogailuraino jarraitu ninduen, ‘egun zoriontsua izan’ esateko».

Aiaraldeko mugimendu feministak eta Matxintxuk taldeak «elkartasun osoa» adierazi diote. Biharko elkarretaratzera deitu dute Orozkon bertan: 19:30ean izango da, Zubiaur plazan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna