'BREXIT'-A

Dibortzioaren data ekainaren 30era arte atzeratzea eskatu dio Mayk Bruselari

Europako Batzordeak maiatzaren 23ra arte atzeratu nahi du

May, gaur, Komunen Ganberan
May, gaur, Komunen Ganberan EFE

Igor Susaeta -

2019ko martxoak 20

Komunen Ganberan mintzatu da Erresuma Batuko lehen ministroa, eta jakinarazi du Donald Tusk Europar Kontseiluko presidenteari gutun bat idatzi diola, atzerapena eskatuz. Hilaren 29a da, oraindik ere, brexit-erako data. Mayk parlamentariei adierazi dienez, ez dago dibortzioa ekainaren 30etik harago atzeratzeko "prest". Berez, Londresen eta Bruselaren arteko dibortziorako akordioa berriro bozkatzekoak ziren, gaur, parlamentuan, baina diputatuek jada bi aldiz bozkatu dutenez haren kontra, testuan "aldaketa garrantzitsuak" egin ezean hirugarrenez bozkatua izatez baztertu zuen ganberako presidenteak, herenegun.

Baina Reuters berri agentziak Europako Batzordearen dokumentu bat du esku artean, eta, horren arabera, Bruselaren brexit-erako asmoak beste batzuk dira. Dibortzioaren data atzeratzeko prest dago, baina "gehienez" maiatzaren 23ra arte. Maiatzaren 26rako daude deituta Europako Parlamenturako hauteskundeak. Horren harira, EBko funtzionario batek adierazi dio Reutersi, Erresuma Batuak hauteskunde horietan parte hartu ala ez apirilaren erdialderako erabaki beharko dutela.

Brexit-erako datari dagokionean beste aukera bat ere badago Bruselaren mahai gainean: luzapen hori "nabarmen luzeagoa" izatea. Lisboako Itunaren 50. artikulua luzatzeko, hau da, dibortzioaren data atzeratzeko, EBko 27 estatuek aho batez onartu beharra daukate eskaera.

Europar Kontseiluaren goi bilera egingo dute bihar eta etzi Bruselan, eta May hara joatekoa da.

 

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna