'Brexit'-a

Komunen Ganberak 'brexit'-aren gaineko kontrola kendu dio Mayri

Komunen Ganberak aldatu egin du biharko eztabaidaren gai zerrenda. Mayk brexit-erako lortu duen akordioak babes nahikorik ez duenez, beste aukera batzuen bozketa gehitu du biharko eztabaidara.

Theresa May Erresuma Batuko lehen ministroa, atzo, Komunen Ganberako eztabaidan.
Theresa May Erresuma Batuko lehen ministroa, atzo, Komunen Ganberako eztabaidan. MARK DUFFY/EFE

Gorka Berasategi Otamendi -

2019ko martxoak 26

Komunen Ganberak esku hartu du parlamentuaren agendan, eta haren gaineko kontrola kendu dio Erresuma Batuko Gobernuari. 27 botoren aldearekin, bihar egitekoa duen bilkuraren gai zerrenda aldatzea erabaki du. Aukera hori gobernuaren esku izan ohi da, baina parlamentuak ezohiko neurriaren alde egin du, brexit-erako akordioak babes nahikorik ez duela ikusita. Hala, Komunen Ganberak bidea irekiko dio beste aukera batzuk bozkatzeari. Oraindik ez dago zehaztuta aukera horiek zein izango diren, baina, ziurrenik, zerrendan izango dira bigarren erreferendum batera deitzea, akordiorik gabeko brexit-a, merkatu batasunean jarraitzeko aukera eta brexit-a bertan behera uztea.

Gobernuak atsekabea agertu du Komunen Ganberak hartutako erabakiarengatik. Haren esanetan, "aurrekari arriskutsua" ezarri du, eta arriskuan jarri du "erakunde demokratikoen arteko oreka".

Parlamentuak B plan baten aldeko adostasuna lortuko balu, ganberaren jarrera ez litzateke loteslea izango, eta Theresa May Erresuma Batuko lehen ministroak aurreratu du ez dela haren erabakia betetzera konprometituko. Hala ere, zalantzarik ez da gisa horretako akordio batek presio egingo liokeela gobernuari. Mayk ohartarazi du ez diola "txeke zuri bat" emango parlamentuari, eta ez du uste bozketa erabilgarri izango denik.

Biharko gai zerrenda moldatzeko bozketaren aurretik, hiru estatu idazkarik dimisioa aurkeztu dute, Mayren gobernuaren kontrako jarrera adierazteko.

Mayk onartu du ez duela nahikoa babes brexit-erako akordioa hirugarrenez bozkatzeko, baina ohartarazi du adostasun faltak brexit-a atzeratuko duela. Euroeszeptikoak eta DUPeko diputatuak konbentzitzeko ahaleginek ez dute uztarik eman. DUPek ezetz dio, eta tory euroeszeptikoenek ere urtarrilaren 15ean eta martxoaren 12an bozkatutakoari eusten diote. Mayk nabarmendu zuen, halere, hori aurrera ateratzeko behar duen babesa lortzen ahaleginduko dela datozen orduetan. Denbora kontra dauka, ordea. "Dibortziorako akordioa aldatzea ez da aukera bat", zehaztu zuen, badaezpada ere. Bruselak behin baino gehiagotan errepikatu du, gainera, ez duela akordioa berriro negoziatzeko intentziorik. Reuters berri agentziak Bruselako funtzionarioak aipatuz kaleratutakoaren arabera, EBrentzat geroz eta gertagarriagoa da akordiorik gabeko brexit-a.

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna