Coppieters Europako fundazioak Patxi Zabaleta ezker abertzaleko kide historiko eta Aralar alderdiak sortutako Ezkerraberri fundazioko presidenteari emango dio aurtengo Coppieters saria. Kultura eta hizkuntza dibertsitatea, kulturarteko elkarrizketa, autodeterminazio eskubidea, gutxiengoen eskubideak, bakea, demokrazia eta Europaren batasuna defendatzen duten pertsonei edo erakundeei ematen die fundazioak saria, urtero, haien lana aitortzeko. Zabaletaren kasuan, epaimahaiak azpimarratu du erreferentziazko pertsonetako bat izan dela euskal politikagintzan azkeneko 40 urteetan, bereziki ezker abertzalearen barruan bide demokratiko eta baketsuen alde izandako lidergoarengatik.
Idazlea, abokatua eta euskaltzaina ere bada Zabaleta (Leitza, Nafarroa, 1947).
Camilo Nogeira galiziar abertzalea ere sarituko dute aurten, joan den martxoaren 7an epaimahaiak erabaki zuenez.
Udazkenean jasoko dute saria, Bruselan egingo den ekitaldi batean.
Orain arte, Alex Salmond, Carme Forcadell eta Edmond Simenonik izan dira sarituak.