"Orain arte ezinezko asko bihurtu ditugu posible; hala ere, garrantzitsuena ez da zer egin dugun, zer egitera goazen baizik". Gure Esku Dago fase berri bat hastera doala aurreratu zuten Angel Oiarbide eta Zelai Nikolas dinamikako bozeramaileek, eta, igandean, Bilboko Euskalduna jauregian dinamikak egingo duen ekitaldiarako egun gutxi falta direla, iragarri dute datorrena orain artekoa baino are garrantzitsuagoa dela.
Dinamikaren bozeramailetzan, beste esku batzuek hartuko dute igandean Oiarbideren eta Nikolasen lekukoa. Ez da aldaketa bakarra izango, ordea. Gure Esku Dago-k aurreratu duenez, "berrikuntzak eta sorpresak izango ditu martxoaren 31ko ekitaldiak. Egindako ibilbidea balioan jarri eta etorkizuneko erronkak mahai gainean jartzeko unea izango da".
Aldez aurretik izena ematea garrantzitsua dela azpimarratu dute. Euskaldunara joan ezin direnentzat, ekitaldia zuzenean emango dute, osorik.