Anabasa handia sortu du Theresa May lehen ministroaren gobernuak egin duen maniobra politikoak, eta oposizioko kideak, kazetariak eta analistak sutsuki eztabaidatzen ari dira horren egokitasunaren inguruan. Erresuma Batuko Gobernuak eta Bruselak joan den azaroan egin zuten akordioari buruz hirugarrenez eztabaidatuko dute bihar Komunen Ganberan, baina bozketarik eginen bada, hori berez ez da akordioari buruz eginen, mozio bati buruz baizik.
Itunak bi zati ditu: bata, dibortziorako terminoak zehazten dituena da, eta, bertzea, deklarazio politiko bateratu bat, etorkizunean Erresuma Batuak eta EBk eduki behar duten harremanaren oinarriak paratzen dituena. Gobernuak aurkeztu duen mozioaren puntuetako batean dibortziorako ituna sartu du, baina kanpoan utzi du deklarazio politikoa. Hortaz, diputatuek mozioari baietz erantzunen baliote, gobernuak onartutzat joko luke dibortzioa, eta brexit-erako epea apirilaren 12tik maiatzaren 22ra luzatuko luke. Egun horretan utziko luke batasuna, joan den azaroan zehaztu zuten modura.
"Ezin dituzu banatu, bertzela batasuna uzteko itunean bakarrik oinarrituta brexit itsu batera zuzenduko gara", adierazi dio Jeremy Corbyn Alderdi Laboristaren buruzagiak BBC kateari. Horregatik, erran du mozioa bozketara ailegatzen bada laboristek aurka eginen dutela. Kontserbadoreek ganberan gehiengo osoa dute Irlandako DUP Alderdi Demokratiko Unionistaren hamar diputatuei esker, baina BBCren arabera DUPek erran du aurka bozkatuko duela.
