Quim Torra Kataluniako presidentea ustezko desobedientzia delitu batengatik ikertuko du Kataluniako Auzitegi Nagusiak. Espainiako Hauteskunden Batzordeak Generalitatearen eraikin publikoetatik xingola horiak erretiratzeko agindu zion Torrari, eta agindu hura garaiz ez zuela bete iritzita, Torra salatzeko bidea hasi zuen batzordeak. Espainiako Fiskaltza Nagusiari eskatu zion Generalitateko presidentea desobedientziagatik ikertzeko. Espainiako Fiskaltza Nagusiak aintzat hartu zuen batzordearen eskaria eta Kataluniako Fiskaltza Nagusiari agindu zion Torraren kontrako kereila bat aurkezteko Kataluniako Auzitegi Nagusian. Orain, auzitegiak onartu egin du kereila, eta Torra ikertuko du. Carlos Ramos izango da instrukzioa gidatuko duen epailea.
Kereilak jasotzen duenez, Kataluniako presidenteak era "kontzientean eta jakinaren gainean" erabaki zuen Espainiako Hauteskunde Batzordearen aginduari muzin egitea. Salaketak nabarmendu du Generalitateko buruak preso dauden buruzagi independentisten aldeko xingolak eta bestelako sinbologia mantendu zuela gobernuaren eraikin publikoetan.
