Carles Puigdemont Kataluniako Gobernuko presidente kargugabetuaren bigarrena izango da Comin JxC Junts Per Catalunyaren bozetarako zerrendan. Clara Ponsati Hezkuntza kontseilari erbesteratua izango da hirugarrena, eta Gorka Knorr Eusko Alkartasunako idazkari nagusi izandakoa laugarrena.
ERC Esquerra Republicanak Cominen erabakia baloratu du. Marta Vilalta alderdiaren bozeramaileak "zorte ona" opatu dio, eta gaineratu du Cominen zirkunstantziak "argiak" zirela. Izan ere, ERCren eta Belgikara erbesteratutako kontseilariaren arteko harremanak aspaldi gaiztotu ziren. Vilaltak jakinarazi du, gainera, ez diotela Kataluniako Parlamentuko diputatu aktari uko egiteko eskatuko. Auzipetutako gainerako parlamentariak ez bezala, Cominek ez zuen galdu diputatu akta prozesuaren judizializazioa dela-eta, baina botoa delegatzeari muzin egin zion. ERCk, horrenbestez, 31 boto ditu parlamentuan, 32 beharrean.
Comin PSCko kidea izan zen, sozialistekin parlamentaria Kataluniako Parlamentuan 2003tik 2010era. Baina 2014an militante izateari utzi zion. ERCren orbitan sartu zen geroxeago, baina inoiz ez da militantea izan.
