Ceutatik (Espainia) Marokora igaro denean atzeman dute Haddadi Rifeko ekintzailea Marokoko segurtasun indarrek, muga zeharkatu bezain laster. Senideek azaldu dutenez, bere amaren hiletara joateko bidaiatu du Marokora. Joan den ostiralean hil zen Haddadiren ama, eta Alhucemas herrira bidean zihoan hari azken agurra ematera. Epaile baten aginduz atxilotu dute. EFE agentziak aipatzen dituen polizia iturrien arabera, legez kanpoko migrazio delitua leporatzen diote.
Haddadi Bilbon bizi da 90eko hamarkadaz geroztik, eta ezaguna da hirian, Berebar jatetxeaz arduratzen delako. EH Bilduren hautagaia da hurrengo udal hauteskundeetan, Bilboko udaletxerako, zerrendaren 20. postuan.
Ongi Etorri Errefuxiatuak plataformak jakinarazi duenez, Marokok ez dio atxilotuari emandako tratuaren berri eman Espainiak Tetuanen duen kontsulatuari. Plataformak salatu du Haddadik ezin izan duela bere abokatuarekin elkartu.