Gola: 0-1: Lemarrek (85. min.).
Ondo jokatu, baina merezitako saririk ez. Eibarri askotan pasa zaio hori sasoi honetan. Gehienetan irabazi beharreko partidak berdinketa bilakatu dira; gaur, aldiz, merezitako berdinketa porrot bilakatu da. Eibar Atletico Madrilen pare egon da, aurre egin dio, eta biek taldeek izan dituzte gol aukera asko, baina aurkariek bakarrik asmatu dute. Lemarrek sartu du gola, partidako azken txanpan (84. min.). Bost jardunaldi falta dira liga bukatzeko eta zortzi puntuko aldea du jaitsiera postuekiko.
Eibar eta Atleticoren arteko partida pentsa zitekeena baino askoz irekiagoa izan da. Horren froga, estatistika: Eibarrek hamar aldiz jaurti du atera, eta Atleticok zortzi. Guztietan garbiena, gainera, aurrenekoa izan da, eta Atleticok izan da. 8. minutuan Correa Dmitrovicen aurrean bakarrik gelditu da eta etxekoen atezainak geldiketa bikaina egin du. Serbiarrak meritu handiko geldiketa pare bat izan ditu.
Oblak Atleticoren atezainak ere lan asko izan du. Lehen zatiaren amaieran eta bigarrenaren hasieran batez ere. Enrich izan da hura gehien estutu duena, erdiraketa eta geldikako jokaldietan, baina hark ez du asmatu. Eibarrek oso ausart jokatu du, Atleticoren arean presionatuz . Gola jaso ondoren bi aukera on izan ditu, baina ez Kike Garciak ezta Jordanek ere ez dute asmatu.
