Joan den asteartean abiatu zen itsasontzia Balear Uharteetatik (Herrialde Katalanak), eta gaur goizean heldu da Greziako Kios uhartera. Botikak, arropak eta bestelako giza laguntza utziko du irlan, eta jarraian Lesbos aldera abiatuko da. Han dagoeneko badute talde bat iheslariei osasun arreta eskaintzen diena, eta haiei laguntzea izango da Aita Mari-ko ekintzaileen helburu nagusia.
Hasieran, erreskate lanak egiteko asmoz ziren joatekoak Greziara, baina Espainiako Gobernuak ez die horretarako baimenik eman. Hala ere, ekintzaileek ez dute itxaropena galdu. "Badira lau urte gure kideak Grezian osasun arreta ematen hasi zirela, eta, beraz, harreman onak ditugu hango agintariekin, horrek agian aukerak zabalduko lizkiguke erreskate lanetan laguntzeko", azaldu du taldeko kide batek.
Kezka ere agertu dute Libiako egoeraren inguruan. Izan ere, azken asteetan okerrera egin dute istiluek, eta horrek handitu egin du iheslarien kopurua.
