Bi ertzain inputatuta daude, ustez, Getxoko (Bizkaia) polizia etxean 42 urteko andre bat jotzeagatik. Ikertu modura deklaratu zuten joan den otsailean Getxoko 4. instrukzio auzitegian. El Correo egunkariak zabaldu du berria, eta gertaeren bideo bat ere eman du argitara. Emandako informazioaren arabera, ertzain batek muturreko bat eta gutxienez hiru ukabilkada eman zizkion atxilotutako andreari, polizia etxean.
'El Correo'-k zabaldutako bideoaren irudi bat.
Hurrengo egunean, ertzainek salaketa jarri zuten andrearen aurka, lesio delituak eta agintearen aurkako atentatua leporatuta. Emakumeak ere salatu egin zituen ertzainak, eta epaileak haiek deitu ditu deklaratzera, ikertu modura. Eusko Jaurlaritzako Segurtasun Sailak ez du xehetasunik eman, baina ziurtatu du borondatea duela auzia argitzeko.
Iazko maiatzaren 26an jazo ziren gertaerak. El Correo-k berri eman duenez. Ertzaintza eskale bat identifikatzen ari zela, poliziei aurre egin zien andreak, eta atxilotu egin zuten. Inputatutako bi ertzainek eraman zuten komisariara, eta, han, gizonezko ertzainak muturreko bat eta gutxienez hiru ukabilkada jo zizkion andreari, aipatutako informazioaren arabera, emakumeak agenteen aginduak desobeditu ondoren.
Otsailaren amaieran deklaratu zuten bi ertzainek, Getxon. Emakumea kolpatu izana aitortu zuen gizonezko ertzainak; El Correo-ren arabera, emakumezko ertzainaren "segurtasuna kolokan" ikusi zuela argudiatu zuen epaile aurrean, eta ziurtatu zuen atxilotuak eman ziola lehen kolpea.