Aurreko hiruhilekoan ez bezala, urte hasiera ona izan du enpleguak Euskal Herrian. Gaindegiak egindako kalkuluen arabera —INEren datuei Ipar Euskal Herriko datuak batuz—, 2018ko bukaeran baino 5.100 langabe gutxiago zeuden aurtengo lehen hiruhilekoan, eta horrek langabezia tasa %9,09ra jaitsi du. Urte hasieran 137.000 lagun zeuden lanik gabe eta biztanleria aktiboa 1.507.000 lagunekoa zen.
Nafarroa da azken hiruhilekoko langabeziaren jaitsieran ekarpen handiena egin duen herrialdea, 6.300 langabe gutxiagorekin. Nabarmen jaitsi da herrialde horretako langabezia tasa, %9,99tik %8,19raino. Bizkaian ere jaitsi egin da langabeen kopurua azken hiru hilabeteetan (-1.500), baina, oraindik ere, langabezia tasa handiena duen herrialdea da —%11,23, INEren arabera— eta Bizkaian daude euskal langabeen %44.
Oso gutxi, baina Ipar Euskal Herrian ere behera egin du langabezia tasak (%7,41), iazko urte bukaeran baino 300 langabe gehiago zenbatuta. Oraindik ere, langabezia tasa txikiena Ipar Euskal Euskal Herriarena da.
Arabako eta Gipuzkoak langabezia datuei begira, INEren eta Eustaten zenbakien artean oso tarte handiak agertzen dira. Madrilgo institutuaren datuen arabera, Araban langabezia tasa %7,54koa da (urte bukaerakoa baino 0,2 handiagoa) eta 12.200 lagun daude lanik gabe Araban. Aldiz, Eustaten arabera, Arabako langabezia tasa %11,30era igo da (+0,4) eta langabeak 18.000 dira.
Gipuzkoari buruz ere datu kontrajarriak agertzen dituzte bi erakundeek. INEren arabera, azken hiruhilekoan langabezia tasa igo egin da Gipuzkoan %8,03raino (+0,5) , eta Eustaten arabera, jaitsi %7,90raino (-0,3). INEk urte bukaeran baino 2.000 langabe gehiago zenbatu ditu Gipuzkoan (27.000); Eustaten arabera, berriz, 1.200 lagun gutxiago zeuden lanik gabe (26.500).
Eustaten datuak aintzat hartuz eginez gero, Gaindegiaren arabera, Euskal Herriko langabezia tasa %9,49koa da. Dena denak, alderaketak urtebete lehenagoko langabezia datuei begira eginez, bi erakundeak bat datoz agertzean langabeziaren bolumena murrizten doan bitartean biztanleria aktiboaren kopurua gorako joeran dela.
Urte batean 18.000 langabe gutxiago
Hala, 2018ko hasieran baino 18.000 langabe gutxiago daude Euskal Herrian. INEren arabera, urte baten buruan Gipuzkoan soilik igo da langabe kopurua (+400). Nafarroan jaitsi da gehien (-7.200), baina apaltzeak handiak izan dira Bizkaian (-6.700) eta Araban (-4.200). Ipar Euskal Herrian jaitsiera txikiagoa izan da (-200).
Gaindegiak Euskal Herriko langabezia datuak Europako Batasunekoekin alderatzeko ariketa ere egiten du. Batasunean langabezia tasak gora egin du (+0,2) azken hiruhilekoan, %6,6tik %6,8ra, eta beraz, Euskal Herriko langabezia tasa, oraindik ere, 2,3 puntu handiagoa da.