Astelehena zen. Azoka eguna Gernikan (Bizkaia). Kaleak jendez beteta zeuden eguna aukeratu zuten Alemaniako nazien Kondor Legioak eta Italiako faxisten Aviazione Legionariak herria airetik bonbardatzeko. Sarraskiaren 82. urteurrenean, Gernika suntsitu zuten eguna oroitu dute. Eguerdian, Gernika sariak banatu ditu Gernika-Lumoko Udalak. Aurtengo sariduna izan dira Christos Stylianides Giza Laguntza eta Krisien Kudeaketarako komisario europarra, Paul Preston historialari hispanista, Angel Viñas katedraduna eta Xabier Irujo Nevadako Unibertsitateko (AEB) euskal ikasketen zentroko zuzendaria.
Stylianidesek ezin izan du saria jasotzera joan, baina bideo bidez eskertu du aitortza. Saria "ohore handiz eta umiltasunez" jaso du, eta nabarmendu du Gernika-Lumo "bakearen eta adiskidetzearen sinbolo unibertsal" bihurtu dela. Komisarioak "irganeko akatsak" ez errepikatzera dietu du eta gerren kontra "ahotsak batu" beharraz ohartarazi du. Saria besteen bizitzak salbatzeko lanean ari direnei eskaini die eta gogorarazi du jardun horretan ari direnek askotan beren bizia jartzen dutela arriskuan, besteena salbatzeko.
Stulianides "harro" agertu da Europako Batasunak "laguntza humanitarioan buru" delako munduan. "Erronkak erronka, nire konpromisoa da bi horretan jarraitzea, zaurgarrienei laguntzea eta bakea eta adiskidetzea sustatzea".
Gernika-Lumoko alkate Jose Maria Gorroñok minutu bateko isilunea eskatu die ekitaldian parte hartu dutenei, herrialde batetik besterako bidaian hil diren errefuxiatuen oroimenez. Horrez gain, Europako Batasunari eskatu dio indartu dezala gerretatik edo pobreziatik ihesean daudenenganako laguntza.
Udalak antzinako bunker hau eraberritu egin du, Condor Legioak herria suntsitu zuen egunean, 1937ko apirilaren 26an, jende ugarik erabili behar izan zuena. El Ayuntamiento ha recuperado el búnker situado en la fábrica de Talleres #Gernika. pic.twitter.com/OOkDSKAXlK
— Gernika-Lumoko Udala (@AytGernika) 2019(e)ko apirilaren 26(a)
Bestalde, Gernika-Lumoko udalak bonbardaketaren garaiko bunker bat eraberritu du, eta gaur ireki du. Herritar ugari hartu zuten babes bunker horretan, bonbetatik ihesi.
Arratsaldean, bonbardaketan hil zirenen omenezko lore eskaintza egingo dute hilerrian. Horrez gain, duela 82 urte bonben arriskuaz ohartarazteko jo zuen sirena entzungo da berriro ere Gernika-Lumon.
