Ostiralean auzipetu gisara deklaratzera deitu du Kataluniako Justizia Auzitegi Nagusiak Josep Maria Jove, ERCko diputatua eta Carles Puigdemonten gobernuko Ekonomia Kontseilaritzako idazkari nagusia. Diru publikoaren erabilera okerra, sekretuak zabaltzea eta desobedientzia larria leporatzen diote Joveri Katalunian erreferendum bat egiteko osatu zen batzordean parte hartu zuelakoan.
Jove 2017ko irailaren 20eko Guardia Zibilaren Generalitateko Ekonomia Kontseilaritzaren aurkako operazioan atxilotu zuten, eta auzipetuta egon zen bere auzia, foruduna delako, Auzitegi Nagusira pasa zuten arte.
Maria Eugenia Alegret magistratuak goizeko 9etarako deitu du. Bere autoan dio "prozesuak" Espainiatik ateratzeko eta erakunde berri bat martxan jartzeko egiturak behar zituela eta Jovek, Ekonomia Kontseilaritzako idazkari nagusi zen aldetik, ardurak izan ditzakeela. Argudiatzen du erreferenduma egiteko zuzenean edo zeharka diru publikoa erabili zela edo gastua behartu zela.
Gainera, Kataluniako herritarren datu pertsonalen fitxategiaren legez kanpoko erabilera leporatzen dio.