Claverina hartzak ustez lehen erasoa egin du artalde baten aurka Zuberoan. Larrainen izan da gertakaria, Euskal Irratiek gaur jakinarazi dutenez. Hain zuzen ere, astelehen arratsaldean gertatu zen erasoa, Elixabea etxaldeko laborari Nicolas Bengoetxeak jakinarazi duenez. Bertsio horren arabera, ardi talde baten aurka ekin zion hartzak, eta haietako bat hil eta gainerako guztiak inguruotan barreiatuta utzi zituen.
Laborariak erasoa salatu du, eta suprefetak baieztatzea falta da. Joan den urrian Esloveniatik ekarri eta Biarnon (Frantzia) askatu zituzten bi hartz eme: Sorita eta Claverina. Soritaren arrastoa berriki topatu dute Ardiden gailurretik (Pirinio Garaiak, Frantzia) gertu. Bi hartz kume izan dituela jakinarazi dute agintariek. Claverina martxoan irten zen hartz zulotik. Aragoin (Espainia) negua pasatu zuen eta Euskal Herrira sartu zela jakinarazi zuten agintariek. Bi hartz emeek geolokalizadorea duen lepoko bana daukate, eta horri esker dakite nondik nora dabiltzan.
