Larrialdi zerbitzuak 75 urteko abeltzain baten bila aritu dira Urbasan, atzotik. 12:00etan aurkitu dute gizona, hipotermia zantzuekin, Nafarroako suhiltzaileek berri eman dutenez. Ameskoabarrenakoa da, eta abereengana irten zen atzo arratsaldean. Etxera itzultzen ez zela ikusita, familiak eman zuen abisua.
Atzo, 22:00ak aldera hasi ziren abeltzainaren bila suhiltzaileak, foruzainak eta Guardia Zibila, Urbasan, Nafarroa eta Arabaren arteko mugan. Gizonaren autoa topatu zuten, baina hutsik zegoen. Goiza argitu ahala, senide eta herritarrak ere ari dira gizona bilatzeko lanetan, eta eguerdian aurkitu dute abeltzaina.
