Albistea entzun

Aleka bilduma

'Nik sinesten dizut', indarkeria matxistari buruzko hausnarketa kritikoa

 

Arantxa Elizegi Egilegor -

2019ko maiatzak 9

Hiru urte joan dira 2016ko sanferminetatik. Baina, hala ere, denek dute gogoan orduan gertatutakoa. Nola bost gizonek emakume bati eraso zioten, eta eraso hark eragindako haserrea. Haserrea, ordea, amorru bilakatu zen epaitegiek bortxaketa zena abusutzat jo zutenean. Gertakari haiek oinarri hartuta idatzi du Samara Velte kazetariak Nik sinesten dizut liburua, bortxaketaren kultura aletu, ulertu eta desagerrarazten laguntzea helburu duena. Liburua eskuragarri dago BERRIA dendan.

Iruñean aurkeztu dute lana, Elkarren egoitzan. Han izan da Velte bera, bai eta lanean parte hartu duten hainbat aditu ere. Kazetariak berak azaldu duenez, sexu indarkeriaren inguruko "zentzuzko kontakizun bat" eraikitzea du xede lanak. "Sexu eraso bat ez da inoiz indarkeria fisikoa soilik, eta, kasu honetan, oso argi geratu dira biolentzia matxistaren aurpegi ugariak". 

Bost ataletan banatzen da liburua: bortxaketaren testuingurua, lehenik; erasoa bera eta hark eragindako erreakzioak, bigarrenik, eta horrekin batera baita indarkeria matxistaren inguruko eztabaida ere; epaiketa eta justizia patriarkalaren zergatiak eta ondorioak; tratamendu mediatikoa, eta komunikabideen praktikak gertatutakoari logika bat bilatu nahian; eta, azkenik, auziak eragindako galderak.

Liburua idazteko hainbat adituren laguntza izan du Veltek, hasi mugimendu feministako kide batzuekin eta unibertsitateko zenbat irakaslerekin bukatu. Veltek argi du zein den ondorioa: "Halako gai bat eztabaida publikora ateratzeko, garrantzia emango dion testuinguru bat behar da, arazo sozial gisa aitortuko duena. Eta hori Iruñean badago".

Elkarrek, Jakinek eta BERRIAk Txalapartarekin elkarlanean argitaratutako Nik sinesten dizut liburua eskura dago gaurtik BERRIA dendan, 16,50 euroan —14,30 euroan BERRIAlagunentzat—.

Horrez gain, Martin Ugalde Foroan ere gaiari buruzko eztabaida egingo da hilaren 16an. Foroan izango dira Velte bera, Amaia Zuria Bilgune Feministako kidea eta Zaloa Basabe Iruñeko udaleko Berdintasun Saileko koordinatzailea. Maite Asensio kazetaria ariko da moderatzaile lanetan.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Elhadji Ndiaye omentzeko ekitaldia, Iruñeko Arrotxapea auzoan, iaz. ©JESUS DIGES / EFE

ESPALOIAN ITOTAKO BIZITZA

Ion Orzaiz

Duela bost urte, 2016ko urriaren 25ean, Elhadji Ndiaye senegaldarra zendu zen, Espainiako Poliziaren zaintzapean, Iruñean. Atxiloketa bortitz baten ostean konfirmatu zuten hila zela. Poliziaren jokabide arrazisten ondorio dela uste dute Ndiayeren lagunek eta gobernuz kanpoko erakundeek.
Egonkorrak bilakatu dira Ipar eta Hego Euskal Herriaren artean Frantziako indar armatuek egiten dituzten kontrolak. ©BOB EDME

Sistemaren belauna lepoan

Oihana Teyseyre Koskarat - Jone Arruabarrena - Ion Orzaiz -Javi West Larrañaga

Migratzaileen aurkako jazarpena fenomeno orokortua da Euskal Herrian. Adituek eta gobernuz kanpoko erakundeek salatu dute Poliziak «sistematikoki» erabiltzen duela bortxa pertsona arrazializatuen aurka.
 ©BERRIA

«Polizia, nahitaez, giltzarri da gizarte arrazista iraunarazteko»

Maite Asensio Lozano

Segurtasunaren zein mehatxuen inguruan zabaltzen diren ideiak «eraikuntza politikotzat» dauzka Douhaibik; horrekin lotu ditu kolektibo arrazializatuen aurkako kriminalizazioa eta jazarpen poliziala.
 ©BERRIA

«Behartu nahi gaituzte Poliziaren aurrean behera begiratzera»

Ion Orzaiz

Modou Faye, 'Beltxa'. Senegal atzean utzita, Iruñera iritsi zen duela urte asko. Paperak ditu orain, Africa United elkarteko burua da, baina horrek ez du Poliziaren jazarpenetik libratu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.