Gaur hastekoa zen Maravillas gaztetxeko 22 kideren kontrako epaiketa Iruñeko 4. Instrukzio Epaitegian, baina epaiketa atzeratzea erabaki du epaileak, defentsa abokatuaren eskaria aintzat hartuta. Nafarroako Gobernuak txosten bat aurkeztu du Rozalejo jauregiak izan dituen kalteen inguruan. Gazteen abokatuak denbora eskatu dute txostena aztertzeko, eta epaileak epaiketa atzeratu du. Horrenbestez, urrian edo azaroan hasiko da.
Akusatutako 22 gazteak 09:45 aldera iritsi dira epaitegira, eta txalo artean hartu dituzte 09:00etatik elkarretaratzean bilduta zeuden dozenaka lagunek, Justizia Jauregiaren atarian. Epaiketa guztien gainetik, Maravillas herriarentzat lelopean, gaztetxeko kideen kontrako epaiketa salatu dute.
Elkarretaratzean, akusatuak aske uzteko eskatu du gaztetxeko bozeramaile batek. Nabarmendu du gazteek ez zutela zilegitasunik gabeko ezertxo ere egin. "Protesta gisa gelditu ziren eraikinaren barruan", adierazi du. Haren esanetan, akusatuek gazteriaren eta Alde Zaharraren kontrako "eraso" bat salatzeko protesta egin zuten.
Kantuan ere gaitzetsi dute 22 gazteen kontrako epaiketa.
Maravillas gaztetxearen aurkako epaiketa salatzeko kontzentrazioa egiten ari dira Iruñeko epaitegian. Kantuan ekin diote kontzentrazioari
— Ainhoa Larretxea (@Ainhoaa8) 2019(e)ko maiatzaren 9(a)
@berriapic.twitter.com/2D9fqSxNyp
Epaiketa Iruñeko 4. Instrukzio Epaitegian izango da, eta sei foruzaingoren deklarazioekin hasiko da. Ondoren, auzipetuek galderei erantzungo diete, eta, azkenik, lekuko gisa deklaratuko dute Nafarroako Gobernuko Ondare Zerbitzuko zuzendariak eta zerbitzu bereko hiru teknikarik.
Akusatuek eskatu zuten lekuko gisa deklara dezatela Nafarroako Gobernuko Ogasun eta Finantza Politika kontseilari Mikel Aranburuk eta Foruzaingoko buruak ere, baina epaileak baztertu egin zuen eskari hori. Kontseilariari dagokionez, epaileak argudiatu zuen haren lekukotzak ez diola ezer berririk gehituko Ondare Zerbitzuko zuzendariak eta teknikariek eskain dezaketenari. Foruzaingoaren buruaren kasuan, berriz, adierazi zuen eraikin barruan egin ziren ustezko lanen berri ematea baino ez zela izan bere esku hartzea.
