Herri Urrats

Milaka euskaltzale Senperen eta ikastola berri bat Arbona-Ahetzen

 

Herri Urrats 2019

Berria -

2019ko maiatzak 13

Arrakastatsua izan da aurtengo Herri Urrats ere. Milaka lagun bildu ziren atzo Senperen (Lapurdi), LK lelopean, egun osoko festaz gozatzeko. Besteak beste, Larzabaleko (Nafarroa Beherea) Manex Erdozaintzi Etxart kolegioa eta Baionako Bernat Etxepare lizeoa berritzeko lanetarako baliatuko dute aurten jasotako sustengua. Ikastola berri bat martxan jartzekotan direla ere iragarri dute Seaskako kideek: Arbona-Ahetzen (Lapurdi) irekiko dute, ikasturte berriarekin.

Une hunkigarririk ere ez da falta izan. Goizeko ekitaldian, 2008tik Seaskako lehendakari aritutako Paxkal Indoren agurra izan zen, kargua uztera baitoa. "Hasi nintzenean 2.100 ikasle zeuden, gaur egun 4200. Garaipenak izan dira, baina hori kolektiboki egin dugu. Euskaldunok badakigu zer den hori; gure indarra da", nabarmendu zuen Indok.

Besteak beste, irakasle gehiagoren beharra mahai gainean jartzeko baliatu zuen ekitaldia Indok: gutxienez 30 postu gehiago behar dituztela azaldu zuen. Ez dute lortu, ordea, Frantziako Hezkuntza Ministerioaren eta EEP Euskararen Erakunde Publikoaren konpromisorik, eta "badaezpada" mobilizaziorako deia egin zuten atzokoan ere. Ostiralean izango da lehenengo hitzordua, maiatzaren 17an: 18.00etan elkartuko dira Donibane Lohizunen, Euskaraz ikasi nahi dugu. Murgiltze eredua ez unki leloarekin.

Giro ederrak lagunduta, goizetik hasi eta arratsera jendetza ibili zen Senpereko lakuaren inguruan. Joaldunak, jan-edana, musika, dantza. Denetarik izan zuten aukeran Herri Urratsen bildutako euskaltzaleek. Guztia posible egiteko, 2.500 boluntario aritu ziren lanean; ikasle, guraso, langile... Lehen balorazioa ona izan dela azaldu dute Seaskako arduradunek.