Datozen orduetan eramango dute epaile aurrera Elgoibarko (Gipuzkoa) erasoarekin lotura duelakoan atxilotu zuten gizonezkoa, Eusko Jaurlaritzako Segurtasun Sailak jakinarazi duenez. Larunbat goizaldean izan zen erasoa, labanaz. 36 urteko gizon bat erasotu eta lekuan bertan hil zen, kalean. 37 urteko andre bat, berriz, zauritua gertatu zen —dagoeneko atera dute ospitaletik—. Hasieran ez zegoen argi zein zen bi biktimen arteko erlazioa, baina gero ertzainek baieztatu zuten bikotekideak zirela.
Elgoibarko Udalak deituta, elkarretaratzea egingo dute iluntzean. 19:00etan izango da protesta, udaletxe aurrean. Larunbatean bertan egin zuten bozeramaileen batzarra, eta erasoak "gaitzespen erabatekoa eta gaitzidura sakona" besterik ezin dituela sorrarazi gogorarazi zituzten batzarrean, aho batez.
