Iruñeko 2. Instrukzio Auzitegiak ikerketa abiatu du, emakume batek Iruñeko kiropraktiko eta masajista baten kontra jarritako salaketaren ondorioz. Andreak salatu du sexu abusua egin ziola masajea emateko aitzakiarekin.
Ikerketaren barruan, magistratuak agindua eman die Foruzaingoari, Espainiako Poliziari eta Iruñeko Udaltzaingoari, beste biktima batzuk identifikatzeko gestioak egin ditzaten, halakorik balego.
Iruñeko erdigunean dagoen masaje zentroa ixteko aukera ere aztertzen ari da epailea, eta hiru eguneko epea eman die aldeei, horren gaineko alegazioak aurkez ditzaten.
Gaur jakinarazi duten ikerketaz gainera, beste bi auzi zabalik ditu ustezko abusatzaileak, bi bezerok jarritako salaketengatik. Horietako salaketa baten epaiketa duela bi aste egin zuten Iruñean, eta sententziaren zain daude aldeak. Beste salaketa artxibatua izan zen behin-behinean.