Espetxeratu egin dute larunbat goizaldean 36 urteko gizon bat labanarekin hil izana leporatuta atxilotu zuten gizona. Elgoibarren (Gipuzkoa) izan zen erasoa, kalean, eta 37 urteko andre bat ere zauritu zuten —dagoeneko atera dute ospitaletik—. Epaile aurretik pasatu ondoren, gaur goizean sartu dute Martuteneko kartzelan 35 urteko gizona. Bi biktimak bikote zirela baieztatu zuen Ertzaintzak.
Eusko Jaurlaritzako Segurtasun Sailak azaldu duenez, baztertu egin dute atxilotuari genero-indarkeria delitua egoztea. Hilketa eta lesio delituak leporatu dizkiote.
Elgoibarko Udalak deituta, elkarretaratzea egin zuten atzo iluntzean. Larunbatean bertan egin zuten bozeramaileen batzarra, eta erasoak "gaitzespen erabatekoa eta gaitzidura sakona" besterik ezin duela sorrarazi gogorarazi zuten, aho batez.
