Balentria egin zuen Realak joan den larunbatean, Espainiako Kopako finala irabazita. "Klubaren historiako orririk politenetakoa idatzi zuten", adierazi du klubak. Horrenbestez, eta talde txuri-urdinak lorpen handiak ospatzeko duen ohiko moldeari jarraituz, Gipuzkoako zaleengana hurbiltzeko bira egingo du ostegun honetan.
Klubaren esanetan, Kopa irabazi izanak "pozez bete du familia txuri-urdina". Nabarmendu du zaleek "berotasun handiz" egin ziotela harrera taldeari igandean, "bai Donostian, bai Anoetako estadioan gizonen taldearen partidan". Orain, zaleei eskerrak emateko garaia dela uste du, "taldeari eman dioten babesarengatik".
"Realaren historian egin ohi den bezala, txapeldunak eta kopa Gipuzkoan zehar erakustea merezi du", adierazi du klubak. Hala, hainbat herri zeharkatuko ditu taldeak goizetik iluntzera arte. Aretxabaletan hasiko dute ibilbidea, eta Irunen amaituko dute. Ondorengoa izango da biraren ordutegia:
11:00 – Aretxabaleta
11:45 – Arrasate
13:00 – Beasain
16:30 – Tolosa
17:30 – Urnieta
18:30 – Lasarte-Oria
19:30 – Hondarribia
20:30 – Irun
