‘Irudikatutako Hiria’ zinema zikloa aurkeztu du Azkuna Zentroak

Oskar Alegria zinemagileak gidatuta, hiria ardatz duten zortzi film luze eta bi labur proiektatuko dituzte. Gaur hasi eta uztailaren 4ra arte luzatuko da zinema zikloa Bilboko Azkuna Zentroko Zinematekan.

MARISOL RAMIREZ/FOKU

Uxue Gutierrez Lorenzo -

2019ko maiatzak 15

Hiri baten paisaia era ez ohikoan pantailaratzeko erronka ezarri dio bere buruari Oskar Alegria zinemagile eta zikloaren komisarioak. Irudikatutako Hiria izenpean, hiri baten hamaika txoko “ezezagun” hamar dokumental garaikideren bidez ikusaraztea da Alegriaren asmoa. La Habana, Paris edo Mexiko gisako metropoli esanguratsuak ageri dituzte filmek, ikusleari “pantailan soilik existitzen den hiri bat” eraikitzen laguntzeko. Gaur hasiko da zikloa Heddy Honigmann zuzendari holandarraren Forever filmarekin.

Alegriaren ustez, “paradoxa eta sorpresa” dituzte oinarrian hamar filmek eta adibide praktikoen bitartez azaldu du hori. “Plaza baten bakartasuna, hildako baino bizidun gehiago dituen hilerri baten ixiltasuna edo hiriaren mugetatik dagoen baso gisako parkea”. Horrelako errealitateak eta beste batzuk mahaigaineratu nahi ditu zikloak, dokumental garaikideen bidez. Uztailaren 4ra bitarte, birritan ikusi ahal izango da film bakoitza.

Bilbon zikloa kokatzeari garrantzia ere eman dio komisarioak. “Bilbo da gure euskal metropolia eta ziklo hau egiteko lekurik egokiena”.

‘Monopoly’ bat bailitzan

Monopoly jolasarekin ere alderatu du Alegriak aurkeztu berri duen zinema zikloa. “Ziklo honek filmez osatutako hiriko mapa bat eraiki nahi du”. Bertan, Alegriarentzat, zikloa programatzearen “jolasa” filmek erakusten dituzten txoko guztiak uztartzean datza, "pantailako hiria" sortzeko. “Film bakoitza adreilu bat da, hiri asmatu horren puska txiki bat”. Horrela izkina bat, hotel bat edo farmazia “soil” bat bihurtzen dira puzzlearen ezinbesteko pieza.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna