Zeru estaliarekin esnatu da Gasteiz gaur, gizonezkoen Euroligako Lauko Finaleko partidak hastekoak diren egunean. Giroa ere ez da hobea izan, goizean zehar behintzat. Guztira, 15.000 bat ikusle espero dituzte igandera bitartean Buesa Arenan. Saskibaloi pista ez ezik, hiriko erdigunea prestatu dute bateko eta besteko zaleak hartzeko, baina hasierako orduetan behintzat, ez da esperotako jai girorik izan Gasteizko kaleetan. Besteak beste, zaleentzako gune bat prestatu dute udaletxe aurreko plazan.
Imanol Magro BERRIAko kazetaria ari da Euroligaren ingurukoak jarraitzen, Gasteizen:
Eguraldiak ez du laguntzen, eta momentuz giro gutxi zaleen gunean. Gehienak ale zaharretik dabiltza. #laukofinalapic.twitter.com/Vu0u5wLdWW
— Imanol Magro (@Imagreto) 2019(e)ko maiatzaren 17(a)
Harrituta Gasteizen dagoen giro hotzarekin. Fan zonetik kale bat urrundu eta ostiral arrunta dirudi. #laukofinala
— Imanol Magro (@Imagreto) 2019(e)ko maiatzaren 17(a)
Batez ere, Turkiatik heldutako Fenerbahce zaleak ibili dira Gasteizko kaleetan. Ostalarien itxaropena da arratsaldean eta hurrengo egunetan gora egitea giroak. Eguraldiari ere egotzi diote hasiera txarra.
Joe Arlauckas, Nikola Vujcic, Johnny Rogers, Igor Rakocevic, Andrés Nocioni, Ibrahim Kutluay eta Michalis Kakiouzis jokalari ezagunek inauguratu dute zaleen gunea, Baskoniaren 5+11 fundazioko kideekin partida bat jokatuta. 3x3 lehiaketa, haurrentzako ekitaldiak eta musika emanaldiak ere izango dira gune horretan, besteak beste, igande arratsaldera arte.
Afixa eta eskuorriak euskaraz aurkitu daitezke. Zaleen guneetako esatarien aldetik, ia ezer ez. Euskal hiztun bakarra zegoela esango nuke. #laukofinala@berriapic.twitter.com/MdW3oJeo7y
— Imanol Magro (@Imagreto) 2019(e)ko maiatzaren 17(a)
Gasteizko Udalak, Arabako Foru Aldundiak, Eusko Jaurlaritzak, Baskoniak eta Euroligak elkarlanean antolatu dute bost milioi euroko aurrekontua duen ekitaldia. Erakunde publikoen artean lau milioi euro jarri dituzte, eta Baskoniak, bat. Gaur jokatuko dira bi finalerdiak. Lehena 17:30ean hasiko da, Fenerbahceren eta Analodu Efesen artekoa. Haren ostean jokatuko da bigarrena: CSKA Moskuren eta Real Madrilen artean, 21:00etan. Igandean jokatuko da finala (20:30), eta orduan jakingo da zein den Euroligako txapeldun berria.