Esprinterrentzako etapa aproposa zen, luzea eta ia laua, eta pronostikoak bete dira, azken zuzengunean erabaki baita irabazlea. Eta azken metroetan Ewan izan da azkarrena. Elia Viviani (Deceuninck-Quick Step) sailkatu da bigarren postuan, eta Pascal Ackermann (Bora) hirugarrengoan. Sailkapen nagusian ez da aldaketarik, eta Valerio Contik (UAE) jarraitzen du maglia arrosarekin. 1.32ra dago Jose Joaquin Rojas (Movistar) eta 1.41era Giovanni Carboni (Androni).
Bihar, ordea, bai espero da sailkapen nagusian aldaketak izatea, ia 35 kilometroko erlojupekoa jokatuko baitute. Lehen eguneko erlojupekoa bezala, aldapan gora bukatuko da, azken 2,6 kilometroak maldan gora baitira: %6ko batez besteko pendiza dute. Primoz Roglic (Jumbo) da faborito nagusia, baina Contirengandik 5.24ra dago, eta bien artean hamar txirrindulari daude. Contik lider jarrai dezake, edo tartean dagoen baten batek lehen koskara jauzi egitea.
