Bigarrenez, preso politiko eta iheslariak aske uztea aldarrikatzen duen pankarta erraldoi bat zintzilikatu dute Generalitateko horma nagusitik, Bartzelonako Sant Jaume plazan. Presoekiko elkartasun mezuak gobernuaren eraikinean jartzeagatik, deklaratzera joan behar izan zuen Quim Torra presidenteak maiatzaren 15ean, desobedientzia egotzita.
Espainiako hauteskundeetarako kanpainan, Generalitatearen eraikinetatik xingola horiak eta esteladak erretiratzeko agindu zion Espainiako Hauteskunde Batzordeak Kataluniako Gobernuari. Torrak, hasieran, beste sinbolo batzuekin ordezkatu zituen—xingola zuriekin eta politikari presoen aldeko mezuekin—. Azkenean, hala ere, agindua bete eta kendu egin zituzten guztiak, eta, haien ordez, adierazpen askatasunaren aldeko mezua jarri zuten, atzo arte Generalitatearen egoitzan ikus zitekeena.
Hala ere, Torraren aurka egitea erabaki zuen Hauteskunde Batzordeak, eta gertatutakoa ikertzeko eskatu zion Espainiako Fiskaltza Nagusiari. Generalitateko buruak, berriz, Espainiako Hauteskunde Batzordearen jarrera salatu du. Haren esanetan, batzordeak Kataluniako independentismoaren kontrako zenbait erabaki "afinatu" ditu, aurretik fiskaltzak ezarritako irizpideen ildotik. Kataluniako presidenteak salatu du bi erakunde horiek elkarrekin aritu direla legearen bidez bere kontra aritzeko.
