Umez inguratuta, ezin bestela, festa giroan aurkeztu dute gaur goizean Aginagan (Usurbil) Gipuzkoako Eskola Txikien Jaia. 32. aldiz egingo da festa, eta ikastetxe horien garrantzia nabarmentzeko baliatu dute ekitaldia. Araba, Bizkai eta Gipuzkoako eskola txikietan koordinatzaile dihardu Mikel Goñik; zentro horien jarduna bermatzeko "elkarlana" ezinbestekoa dela adierazi du: "Horrela jokatzen dugulako elkarren babesa sentitzen dugu, ikasteko aukerak zabaltzen zaizkigu". Eskola horien berezitasunak izaten dira "adin aniztasuna" eta "landa eremukoak" izatea. Tankerako 26 eskola daude Gipuzkoan.
Jaia antolatzeak auzoan aparteko giroa sortu duela onartu dute eskolako ordezkariek: "auzolan erradoi batean" murgilduta daudela esan du ikastetxeko guraso elkarteko ordezkari Amaia Bereziartuak, eta horrexek aparteko hauspoa eman diola Aginagako bizimoduari. 41 ikasle ditu egun Aginagako herri eskolak, HH2n hasi eta LH6ra bitartean. Desagertzeko zorian egon zen orain dela urte batzuk, baina orain sendo dago.
Ezin bestela, haurrek eman diote Gipuzkoako Eskola Txikien aurkezpen jaiari amaiera. @berriapic.twitter.com/nkoAMwVXE1
— Arantxa Iraola (@ArantxaIraolaAl) 2019(e)ko maiatzaren 29(a)
Usurbilgo alkate Xabier Arregik festara hurbiltzeko deia egin du. "Bada modu bat Gipuzkoa osoko eskolen eta herri txikien artean nolabaiteko konplizitatea sortzeko, eta horrek balio handia du" Festa 10:30ean hasiko da, eta askotariko ekitaldiak egingo dira ondoren: umeentzako jolasak eta tailerrak, puzgarriak, ikuskizunak...
