Zisjordanian Israelgo Administrazio Zibilak ematen ditu eraikuntzarako baimenak. Giza eskubideen aldeko B'Tselem erakundeak salatzen duenez, ordea, baimen horiek kolono israeldarrei soilik ematen dizkiete, eta palestinarren eskaerak etengabe oztopatzen idituzte, haien lurren okupazioa errazteko.
Hori gertatu da Ibziqen. Iazko urrian prefabrikatutako bi ikasgela desegin zituen han Israelgo Armadak, "baimenik gabeko eraikuntzak" zirela argudiatuta. Ikasgela horiek EBko estatu kideek finantzatu zituzten NBEko giza laguntzarako programaren bidez. Baina Tal Avivek "kanpoko esku-hartzetzat" du EBren laguntza, eta beraz, ez du onartzen.
B'Tselem erakundeak salatu du 49 haur palestinarrek kalean jaso behar dituztela klaseak orduz geroztik. Bruselak berak ere eraikinak itzultzeko eskatu dio Tel Avivi, gogoraraziz haur guztiek dutela hezkuntza eskubidea eta estatuen betebeharra dela hori eskaintzea, bermatuz eskolak haurrentzako eremu seguruak direla. "Palestinarren jabetzak suntsitu eta konfiskatzeari utzi behar dio Israelek, eta nazioarteko giza eskubideak errespetatu behar ditu indar okupatzaile gisa".
Israelek, ordea, bere bideari jarraitu dio palestinarrei inolako kalte ordainik eman gabe. Aldiz, palestinarrei kendutako bi ikasgelak enkantean atera ditu. Ez da lehen aldia halakorik egiten dutena, baina bai giza eskubideen aldeko erakunde batek gertatutakoa frogatzen duten dokumentuak eskuratzen dituela. Sarit Michaeli ikerlariak azaldu duenez, dokumentuetan jasotzen da prefabrikatutako eraikinak "eraikitzeko baimenik gabeko arkeologi gune batean" zeudela.
Hildako bat
Bestalde, Israelgo segurtasun indarrek zabaldu dutenez, Jerusalemen palestinar batek bi israeldarri eraso dio labanaz gaur. Poliziak tiroz hil du ustezko erasotzailea, 19 urteko palestinarra. Otoitz eguna da gaurkoa musulmanentzat eta milaka lagun espero dituzte mezkiten zabalgunean.