Azoreetan geldiarazi du Gure Leire ontzia Espainiako Aduana Zaintzak, eta 2.500 tona kokaina aurkitu dituzte ontzi barruan, 84 fardeletan banatuta. Espainiako Ogasunak azaldu duenez, tripulazioko zazpi kideek —bost galiziar eta bi ondarroar— behin-behinean espetxeratu dituzte, armadorea barne. Ontzia Ondarroako (Bizkaia) portuan zegoen erroldatuta. Kofradiak jakinarazi elkartetik kanporatu zutela, zituen zorrengatik.
Itsasoan egindako atxiloketez gain, hiru etxebizitza miatu dituzte Bizkaian, Auzitegi Nazionalak gidatu duen polizia operazioan. Ondarroan eta Berriatuan egin dituzte miaketak.
Polizia joan apirilean hasi zen Gure Leire ontzia ikertzen, Coruñako portuan sartu zenean Aduana Zaintzari piztu zizkion susmoengatik.
Ikerketaren arabera, atzemandako droga Surinameko Errepublikatik irten zen beste ontzi batean, eta Gure Leirek hartu zuen ondoren. Ontzia Azoreetan atzeman zuten joan den astelehenean, eta gaur porturatu dute Vigon (Galizia). Atzemandako kopuruak 80 milioi balioa izango luke legez kanpoko merkatuan.
