Memoria historikoa

Jaurlaritzak 1.231 herritarren zantzuak topatu ditu Erorien Haranean

Gogora institutuak egindako txostenaren arabera, "gehienak" familiaren baimen barik eroan zituzten

Borja Mendez / EFE

Ibai Maruri Bilbao -

2019ko ekainak 10

Araba, Bizkai edo Gipuzkoan ehortzita egon eta Erorien Haranera eroandako pertsonen zerrenda osatu du Gogora institutuak; sortzez hiru herrialdeotakoak izan baina Espainian ehortzita egon eta Erorien Haranera eroandakoak ere zenbatu dituzte. Gaur bidali du txostena Eusko Legebiltzarrera. Guztira, Erorien Haranean egon daitezkeen 1.231 herritarren zantzuak topatu dituzte: 1.076 gorpuzki dira Araba, Bizkai eta Gipuzkoako hilerrietatik ateratakoa.

Gogorak hainbat iturritatik edan du azterlana egiteko: Aranzadik 2018an egindako txostena, Espainiako Justizia Ministerioaren Erorien Haranean ehortzien inguruko errolda, Espainiako Administrazioaren Artxibo Nagusia, hiru herrialdeotako artxibo probintzialak, udal artxiboak eta Bilbo, Donostia eta Gasteizko hilerrietako erregistro liburuak. Guztira, 917 daude identifikatuta. Txostenaren arabera, "gehienak" familiaren baimenik gabe eroan zituzten Madrileko monumentura. Soilik 257 kasutan baieztatu ahal izan dute "nolabaiteko" baimen batekin eroan zirela. Bi kasutan familiak aurkako jarrera erakutsi zuela frogatzen duten agiriak topatu dituzte. 

Une honetan Araba, Bizkai eta Gipuzkoako hamar familia ari dira euren senidearen gorpuak Erorien Haranetik atera eta Euskal Herrira ekartzeko prozedura osatzen; horietatik zazpik Gogora institutuaren laguntza jaso dute. 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna