Hezkuntza

NUPek Medikuntza emango du irailetik aurrera

Nafarroako Gobernuak azken baimena eman dio unibertsitate publikoari, eta ostiralean bertan zabalduko dute izena emateko epea. 60 ikasle hartuko dituzte, eta gaztelaniaz emango dute gradua.

Nafarroako Unibertsitate Pubikoa, artxiboko irudi batean.
Nafarroako Unibertsitate Pubikoa, artxiboko irudi batean. Idoia Zabaleta/Foku

Garikoitz Goikoetxea -

2019ko ekainak 12

Ofiziala da jada: Nafarroako Unibertsitate Publikoan Medikuntzako gradua eskainiko dute datorren ikasturtean. Nafarroako Gobernuak asteroko bileran eman dio azken onarpena, aurreko tramite guztiak gaindituta. Maria Solana Hezkuntza kontseilariak nabarmendu du agintaldi osoan egindako lana "burutu" dutela pauso horren bidez.

Irailean hasiko dira ikasketak ematen, eta izena emateko epea ostiralean zabalduko dute. Denera 60 ikasle hartuko dituzte ikasturte bakoitzean. Orain arte, Nafarroan Opusen unibertsitatean ikas zitekeen Medikuntza. NUPen gaztelaniaz emango dituzte ikasketak.

Gobernuak adierazi du osasun zerbitzuak hobetzeko bidea emango duela unibertsitate publikoan Medikuntza eskaintzeak, eta osasun ikerketaren arloan ere bultzada izango dela. "Ezagutza sortuko da, eta ospitaleko jarduna irakasletzarekin eta ikerketarekin batzen duten profesionalen ibilbidea bultzatuko da".

Lehen bi ikasturteetan behin-behineko eraikin batean emango dute gradua, Osasun Zientzien Fakultatean. Hala ere, prozesua martxan jarri dute behin betiko eraikin bat egiteko. Gobernuak adierazi du aztertzen ari direla eraikinak zer ezaugarri eduki beharko lituzkeen.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna