Gizartea

Jaurlaritzaren gurasotasun baimenen dekretuaren aurka egin dute sindikatuek

Enplegu publikoa arautzeko lege proiektuko puntuetako bat zen, baina hortik kanpo tramitatu nahi du gobernuak, eta sindikatuak kexu agertu dira. Jaurlaritzak irailean jarri nahi ditu indarrean hemezortzi asteko baimenak EAEko langile publikoentzat.

Gurasotasun baimenekin lotutako protesta bat
Gurasotasun baimenekin lotutako protesta bat / Idoia Zabaleta (Foku)

Jokin Sagarzazu -

2019ko ekainak 12

Eusko Jaurlaritzak irailean jarriko ditu indarrean EAE Euskal Autonomia Erkidegoko langile publikoen gurasotasun baimenak. Enplegu publikoa arautzeko lege proiektutik kanpo utzi du neurri hori, eta dekretu bidez onartu nahi du. Kexu agertu dira sindikatuak.

Enplegu publikoko egitasmoan hamasei astekoak ziren baimenak. Dekretuaren bidez hemezortzikoak izatea proposatu du gobernuak. Horren arabera, langile publiko diren guraso guztiek — sexu berekoek, biologiko zein ez-biologikoek eta guraso bakarreko familietakoek— izango lukete hemezortzi asteko baimena hartzeko eskubidea, eta soldaten %100 jasoko lukete. Eusko Jaurlaritzaren menpeko administrazioan lan egiten duten 70.000 beharginei eragingo lieke neurriak.

Jaurlaritza sindikatuen bildu da gaur Administrazio Publikoko Mahai Orokorrean, eta UGT salbu, beste guztiak azaldu dira egitasmoaren aurka. LABek bilera utzi du, eta gerora ezagutu da ELAk eta CCOOk ere ez dutela proposamena babestu. Nolanahi den, Eusko Jaurlaritzak jakinarazi du hurrengo Gobernu Kontseiluan onartu duela dekretua, neurria irailaren 1ean indarrean sartu ahal izateko.

LABen arabera, Jaurlaritzaren proposamenak ez dakar berritasunik ia. Berri agentziei eginiko adierazpenetan, gogoratu du amatasun baimenen iraupen «berbera» jasotzen duela. 24 astekoa proposatu du sindikatuak. Era berean, "propagandatzat" jo du neurria. "Gai izar batzuk inposatzen ditu, besteetatik bananduz, eta sindikatuen babesa bilatzen du bere burua legitimatzeko".

Antzera mintzatu du CCOO. Beretzat ere "erabat populista" da egitasmoa. Kritikatu du gobernuak Administrazio Publikoko Mahai Orokorrera soilik neurri hori eraman duela, eta kanpoan utzi dituela langile publikoen lan baldintzekin loturiko besteak.

ELAk ohartarazi du gobernuak ez daukala negoziatzeko "borondaterik", eta mobilizazioa beharko dela. "Benetako berdintasun politikak" ezartzeko eskatu du.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna