Nahiz eta Bodegas Camilo Castilla SL, Ana Beltranen familiaren upeltegia, 2018ko hartzekodunen zerrendan agertu, tratua egin berri du Ogasunarekin, eta hurrengo urtean ez da agertuko. Zorraren %41 higiezin eta eraikuntza arloko enpresek dute, eta tartean daude krisian hondoratutako enpresa handiak: Construcciones Juan Bautista Flores (zazpi milioi), Los Arcoseko zirkuitua eraiki zuen Construcciones Samaniego (3,5 milioi) eta Aldabea (4,1 milioi).
Oro har, 302 milioi zor diote zordunek Ogasunari: hiru laurden enpresak dira, beste %23,5 norbanakoak, eta gainerako %1,2 izaera juridikorik gabeko entitateak. Halaber, zordunen %94k Nafarroan dute helbidea. Eraikuntzaz gain, merkataritza eta ostalaritza arlokoak dira hartzekodunen %20,4, industria eta ekoizpen arlokoak %9,6, garraiokoak %4,7, eta zerbitzu profesionalak %6,15.
Gehien-gehienak 2017ko zerrendan ere agertzen ziren, baina 149k zor hori handitu egin dute (22,6 milioi) eta beste batzuek gutxitu (3,9 milioi). Guztira, 99 zordun berri daude, eta 48,5 milioi zor dute.
Izen ezagunen artean, Gabriel Urralburu Nafarroako lehendakari ohia agertzen da: 426.744 euroko zorra du oraindik ere. Beste politikari ohi bat Ignacio Galipienzo Eguesibarko alkate ohia da —142.273 euro zor ditu—, Galipienzo auzi-ko akusatu nagusia —auzitegiek azkenean urtebeteko espetxe zigorra ezarri zioten—. Denis Mentxov eta Vladimir Karpets txirrindulari ohiek 373.859 eta 678.651 euro zor dituzte, hurrenez hurren.