Igandeetan lan egitearen aurkako ekintza "umoristikoa" egin du Bizi mugimenduak Baionako supermerkatu batean. Lanaren eta aisialdiaren arteko kontziliazioa eragozten duten lan baldintzak salatu ditu, baita igandeetan erosketak egitea ere. Era ezohiko eta ikusgarrian egin du protesta. Dozenaka militante inguru Lapurdiko hiriburuko Intermarche saltoki batera sartu dira, eta igandeetan arruntak izaten diren aisialdi jarduerak egin dituzte bertan.
"150 militante etorri dira haien usaiazko igandeetako aisialdiak pasatzera Baionako Intermarchera: petanka partidak, bizikleta, jokoak, lasai egote, zintzur bustitze eta piknika", idatzi du Mugik bere Twitter kontuan, hainbat argazkirekin lagundutako mezuan. "Igandeetako lanari ez. Gure biziak ez dira salgai" dio supermerkatu barruan zabaldu duten pankartetako batek.
Bizik salatu du gizartean hedatzen ari den lan baldintza prekarioekin geroz eta murrizten ari dela familiarekin eta lagunekin egoteko aisialdi denbora, kultur eta kirol ekintzetan parte hartzekoa, eta abar.
Bizi mugimendua bere hamargarren urteurrena ari da ospatzen asteburuan, Baionan. Duela hamar urte, gaurko ekintza bera burutu zuten supermerkatu berean.
