Emakumeen Mundu Martxak deituta, elkarretaratzea egingo dute bihar Urruñan (Lapurdi), asteleheneko hilketa salatzeko. Etxean hilda aurkitu zuten Mayie Nervi 81 urteko emakumea, tirokatuta; haren bikotekidea ere hilik aurkitu zuten. Poliziaren hipotesia da gizonak hil zuela andrea, eta gero bere buruaz beste egin zuela.
Mugimendu feministak ohartarazi du Urruñako hilketa ez dela "eraso bakan gisa" ulertu behar, baizik eta emakumeen aurkako indarkeriaren zati gisa. Hortaz, ardura hartzeko deia egin du: "Apustu ausartak eta neurri sakonak beharrezkoak dira. Hitzetatik praktikara pasatzeko garaia da". Autodefentsa feministaren aldarria egin du.
Urruñan, herriko etxe aurrean egingo dute protesta, 18:30ean. Protestak dituzte Donostian (18:30), Gasteizen (19:00), Bilbon (19:30) eta Iruñean (20:00).
BERRIAren hilketa matxisten mapan, 2003tik indarkeria matxistak hildako 99. emakumea da Nervi —11 ume ere hil dituzte—.
